Wier drü Lernende vo Chnusper-Becke in Schönried us em Detailhandel u der Produktion hei d Müglichkeit übercho, ünses eigeta Projekt uf d Bei z stelle.
Gstartet hets mit der Idee vo ünser Chefin, dr Andrea Wehren. Mu chönnti e Verchoufsaktion organisiere ...
Wier drü Lernende vo Chnusper-Becke in Schönried us em Detailhandel u der Produktion hei d Müglichkeit übercho, ünses eigeta Projekt uf d Bei z stelle.
Gstartet hets mit der Idee vo ünser Chefin, dr Andrea Wehren. Mu chönnti e Verchoufsaktion organisiere mitere ganz spezielle Botschaft, nämlich «Es Lächle schänke u es chunnt zrugg». U wells Produkt eignet sich ächt da am beschte? Natürli der Spitzbueb. Aber nid eifach e klassischa, sondern eina, wo ünser Chunde ganz nach ihrne Vorliebe dörfe usaläse.
Wier si zäme gsässe u hei nus für vier verschidnigi Fülligi entschide u zu jedera Füllig e eigeti Farb Glasur kreiert. Derna hei wier für allz Organisatorischa, wo derzue köhrt, ünsi Fantasie dörfe la walte. Wie wier der Flyer, ds Schoufenster u der Verchoufstisch wei gstalte, isch üns überlah worde. Natürli weris aber ohni d Hilf u die kreative Ideene vor Andrea nid halb eso guet usacho. Wier sy flissig dranne gsässe u hei üns für e gross Tag vorbereitet. Für ünser Chunde ufmerksam z mache, hei wier ünses Spitzbuebe-Schoufenster dekoriert, verschidnigi Produkt usgstellt u natürli ünser Flyer verteilt.
Am 25. Juli isch der gross Tag vor der Tür gstande u wier hei ünser letschte Vorbereitige troffe. Vorem Gschäft hei wier ünsa Verchoufstisch ufgstellt u Ballön ufblase, wos der eint oder ander o klöpft het. Daniel, wo ids zwöita Lehrjahr als Beck chunnt, het vor Ort nach de Wünsch vor ünsne Chunde dr Spitzbueb gfüllt. Olivièr, ünsa Lehrling im Detailhandel, wo äbefalls ids zwöita Lehrjahr chunnt, het sie schön verpackt, u iech ha am Schluss ykassiert. Zum Deguschtiere hei wier ünsne Chunde o chlini Spitzbüebeni abote.
Es het nus e rise Fröid gmacht, dass wier flyssig hei dörfe verchoufe u de Lüt es Lächle ids Gsicht hei chöne zoubere. Der Erlös vo däm Tag hei wier under üns drü ufteilt u als Zuestupf für ünses Kässeli dörfe bhalte.
Die Verchoufsaktion isch nid nume es super Erläbnis gsy, wier hei ono grad Vorbereitigsufträg für die überbetribliche Kurse chöne erledige. U am Schluss hei wier üns natürli gfragt, weli Füllig am beliebtischte isch gsy. Eidütig der Gwinner – ob bi Chlyn oder Gross – isch d Nutellafüllig gsy.
Wier gfrüwe nus, o i Zuekunft wyteri Projekt uf d Bei z stelle u sy sehr dankbar, dass üns d Andrea die Verchoufsaktion überhoupt müglich gmacht het.
DANJA ELLENBERGER, LEHRNENDI DETAILHANDEL 3. LEHRJAHR
